圓桌德州撲克第二季：林子聰劉偉強片場撞鬼裝香上攝影機田啟文買中鬼屋結局竟然係咁

分享給更多撲克朋友，加入大家庭。Share with your friends and join the family.

圓桌德州撲克第二季：林子聰劉偉強片場撞鬼裝香上攝影機田啟文買中鬼屋結局竟然係咁

圓桌德州撲克第二季 ：林子聰劉偉強片場撞鬼裝香上攝影機田啟文買中鬼屋結局竟然係咁。HKPPA整理報導，Eric Kwok郭偉亮與劉浩龍主持的網絡節目《圓桌德州撲克》（Round Table Poker）每集均會邀請娛圈名人擔任嘉賓，邊玩Poker邊傾談演藝經歷與趣事。早前節目邀請到電影《少林足球》三位師兄弟出席節目，田啟文、陳國坤與林子聰罕有合體亮相，與兩位主持邊分享香港電影影壇趣事，並由模特兒Angus張若錡擔任性感荷官。

圓桌德州撲克第二季 HKPPA 少林足球三師兄弟

田啟文買鬼屋畀鬼砸

節目中，電影監製田啟文分享到一則靈異事件，他表示首次置業時，竟然從二手樓市場買到鬼屋，並有「畀鬼砸」的靈異經驗。田啟文表示：「無啦啦就畀……我哋叫『畀鬼砸』，完全唔郁得。如是者咁樣砸咗好耐，我話究竟係男定係女嚟呢？」陳國坤隨即笑指：「女嚟嘅就冇所謂啦！」田啟文續指：「咁我又冇刻意問啲師傅，咁又唔見佢搞我，咁咪由佢囉！」

圓桌德州撲克第二季 HKPPA 郭偉亮/劉浩龍/田啟文

田啟文更表示，自己曾問纏繞在家中的鬼「攞冧把」買六合彩，田啟文笑指事件其實頗「陰公」，他表示：「係真係報夢咁嘅，佢報咗三個字，咁我咪走去買六合彩，攞10蚊走去買，攞10蚊走去買就中咗100蚊。」然後他便用贏來的100蚊再買六合彩：「然後我再用嗰三個字走去買，寫咗10張、拖唔同冧把，買到最尾嗰張又買唔到，剩係買咗9張。咁諗住攞返個本，咁一對，一張中咗三獎，然後幾張係中咗其他，冇買嗰張係中頭獎。」但田啟文表示當時六合彩數字比現今少，而彩池亦相對沒有現今的龐大，頭獎其實亦只有三十多萬。

圓桌德州撲克第二季 HKPPA 田啟文分享自己買到鬼屋

最後，被問及鬼魂的下落時，田啟文表示有一位朋友到他家中借宿一宵：「咁半夜我聽到佢喺到鬼殺咁嘈，我以為佢發開口夢啦，我又冇嘢、咁就繼續瞓啦！第二日朝頭早起身，我話『你做乜鬼尋晚喺到半夜喺到嘈？』跟住佢就即刻彈起身話『你屋企有嘢啊！』我都唔記得咗啊！然後佢話佢（鬼魂）踩佢，然後佢就醒，跟住佢識法（法術）就打，就滅咗佢！」田啟文表示原來朋友懂得茅山法術，然而自己對朋友的技術卻一直不知情。

劉偉強對攝影機上香

提到靈異事件，林子聰亦提到參與某次拍攝的經歷：「我就試過一次，部機唔郁，拍菲林Roll極都Roll唔到，一Roll就停，又唔係冇電、咩都Check過晒都冇事。咁劉偉強（導演/攝影師）就講句粗口先，然後返轉頭，唔好拍！然後叫個助手裝香。咁我哋就『裝香？裝咩呢？』裝喺佢部機到啊！插喺部機到啊！跟住插咗落去一陣間Roll到喇！乜都冇搞過！」表示類似的拍攝靈異事件，自己也僅遇過一次。

【關於 HKPPA 香港撲克牌手協會】
HKPPA 為香港撲克牌手公認協會(Hong Kong Poker Players’ Association)，是由多名香港知名職業牌手所組成，我們將提供德州撲克教學以及德州撲克資金管理等優質內容, HKPPA 香港撲克牌手協會目標以推廣香港撲克文化交流而生,致力於培養更多職業撲克牌手參與國際撲克賽事並且與國際選手相互交流與成長。